Создади смисол, направи промени, размисли и остани дама и на 50+

Најсреќната одлука која ја донесов на моите 50+ години е да ги оставам луѓето, за мене да мислат што сакаат. Ама баш, што сакаат. Впрочем, тоа си е нивна работа, тоа се нивни мисли, нивни капацитети и нивно залудно потрошено време. Јас ниту со тоа, ниту од тоа немам, ама баш ништо.

И сега сум прекрасно слободна!

           Повеќе не се плашам да разочарам некого.

Не влегувам во дискусиии со длабоко фрустрирани луѓе, за да им докажам дека сум во право.

Тоа ми стана здодевно!

Сега навистина жалам за потрошеното време и енергија за таквите глупости, од времето пред моите 50+. Сега ми е премногу смешно и излишно да се присилувам себе си да разговарам со оние со кои не сакам да разговарам, да правам глупави преписки со луѓе кои ниту ми се интересни, ниту ми се достојни. Сега ми се смешни и излишни оние кои сакаат да ми ги закачат сопствените комплекси и фрустрации, како и оние кои сакаат да разговараат со мене за она за кое јас не сакам да разговарам со нив.

Здодевно ми е да велам ДА, кога сѐ во мене вели НЕ. Здодевно ми е да се извинувам заради фактите, аргументите и логиката кои се темел на моето мислење. Повеќе никому не му наметнувам култура на говор и мислење, ама и не дозволувам да ме убедува дека културата, науката и уметноста, кај нас се камен темелник на секоја залудност.

Драги мои дами од генерациите 50+, топло ви препорачувам да научите да ви биде здодевно. Тоа е единственото нешто кое ќе ве спаси и зачува за луѓето од вашиот живот, за оние кои навистина ви значат.

Одбијте емоционално да им служите на оние кои мислат дека нивното мислење треба да го управува вашиот живот!

Уживајте во животот и оставете ги „мислителите“ да се гушат во прашината која ја кревате зад вас.

 Со почит,

Даниела